دوای زیاتر لە چوار ساڵ لە نەبوونی دامەزرێنەرانی خزمەتگوزاری ئینستاگرام، جارێکی تر بە ئەپڵیکەیشنێکی نوێ گەڕانەوە کە بە "تیک تۆک نیوز" وەسف کرا.
ڕۆژی سێشەممە، کیڤن سیسترۆم و مایک کریگەر خستنەبازاڕی ئەپی نوێی خۆیان بە ناوی Artifact ڕاگەیاند کە بەڵێنی هەواڵێکی تایبەتمەند دەدات لەسەر بنەمای نوێترین تەکنەلۆژیای AI.
کریگەر لە پۆستێکیدا لە تۆڕی کۆمەڵایەتی ئینستاگرام ڕایگەیاندووە کە خۆی و سیسترۆم زیاتر لە ساڵێکە لەگەڵ تیمێکی بەتوانا کاردەکەن لە دوای خستنەبازاڕی ئەپەکەوە. ئاماژەی بەوەشکرد، وردە وردە دەستیان کردووە بە بەردەستکردنی ئەپەکە بۆ بەکارهێنەران. ئێستا هەر کەسێک دەتوانێت بەشداری لیستی چاوەڕوانی بکات بۆ تاقیکردنەوەی ئەپەکە.
بە پێچەوانەی ئینستاگرام، ئەپی نوێ بە پلەی یەکەم گرنگی بە بابەتەکان دەدات نەک وێنە، چونکە ئارتیفاکت پێشنیاری ناوەڕۆک دەکات لەسەر بنەمای ئارەزووەکان.
بەگوێرەی ماڵپەڕی (Platformer) کە یەکەم کەس بووە ڕاپۆرتی خستنەبازاڕی ئەپڵیکەیشنەکەی داوە، ڕێگە بە گفتوگۆکردن لەگەڵ هاوڕێیان دەدات.
فیدی سەرەکی ئەپ نوێیەکە بابەتی بەناوبانگی ڕێکخراوە میدیاییە گەورەکان و هەروەها بلۆگەکانی دیکە پیشان دەدات و فیدی بەکارهێنەرەکەش زیاتر کەسایەتی دەبێت بە پشتبەستن بە ئارەزووەکانی.
ئەم نمایشکردنە لە کاتێکدایە کە پلاتفۆرمەکانی سۆشیال میدیا چالاکیی نوێ ئەزموون دەکەن لە دوای ئەو گێژاو و نادڵنیاییەی کە لە سەردەمی خاوەنە نوێیەکەی ئیلۆن ماسکدا تویتەری گرتەوە.
ژمارەیەک خزمەتگوزاری هەوڵدەدەن یارمەتی بەکارهێنەران بدەن بۆ گرتنی هەواڵەکان لە فیدێکی خێرادا. هاوکات، بەرزبوونەوەی خێرای خزمەتگوزاری هاوبەشکردنی ڤیدیۆی کورت فۆڕم تیک تۆک بەردەوامە لە پاڵنانی زۆرێک لە ئەپەکان، لەنێویاندا ئینستاگرام، بۆ کۆپیکردنی تایبەتمەندییەکانی.
ئەپی نوێی Artifact لە کۆمپانیای Systrom و Krieger لەلایەن Platformer بە "tiktok بۆ دەق" وەسف کراوە، و لەوانەیە هەڕەشەیەکی لەناکاو بێت لە تویتەر.
دوای ئەوەی لە ساڵی ٢٠١٠دا پێکەوە ئینستاگرامیان خستە بازاڕەوە، سیسترۆم و کریگەر لە ساڵی ٢٠١٢ ئەپەکەیان بە فەیسبووک فرۆشت بە بڕی یەک ملیار دۆلار، لە ساڵی ٢٠١٨ کۆمپانیاکەیان بەجێهێشت.
لەو کاتەدا باس لەوە کرابوو کە هۆکاری پشت ڕۆشتنی ئەو گرژییانە بووە کە لە نێوان دامەزرێنەرانی ئینستاگرام و بەڕێوەبەری جێبەجێکاری فەیسبووک مارک زوکەربێرگ ڕوویدا لەسەر خواستی ئەم دووەمیان بۆ تێکەڵکردنی زیاتری ئینستاگرام لەگەڵ فەیسبووکدا. بە تایبەت کە سیسترۆم و کریگەر بەو کەسانە ناسراون کە ئینستاگرام لە فەیسبووک جیاواز دەهێڵنەوە.
لەدوای جێهێشتنی کۆمپانیاکە، سیسترۆم و کریگەر پڕۆژەیەکیان دروستکردووە کە تیشکی خستۆتە سەر ئەپڵیکەیشنە کۆمەڵایەتییەکانی داهاتوو و بەگوێرەی پلاتفۆرمەر ئەپی ئارتفاک یەکەم بەرهەمە لەو پڕۆژەیەدا.